April 16, 2013

苟芸慧惹殺身禍 王君馨亂爆粗


無綫藝人王君馨和苟芸慧(苟姑娘)均在外國土生土長,中文水平欠奉,所以在聽、講廣東話時經常鬧出不少笑話!苟芸慧不知「殺你」有「OK」的意思,還以為別人真的動了殺機;王君馨則少不免有失斯文,不經意爆粗。

http://orientaldaily.on.cc/cnt/entertainment/20130414/photo/0414-00282-070b2.jpg
苟芸慧初回港時,因中文麻麻而對別人的說話捉錯用神。


http://orientaldaily.on.cc/cnt/entertainment/20130414/photo/0414-00282-070b3.jpg
王君馨(左)與苟芸慧都是在外國回來,所以同聲同氣。

首次見面同場比舞
苟:第一次見面,就係選美嘅時候,因為君馨係我參選華姐嗰年嘅表演嘉賓,你嗰陣同吳卓羲要唱《熱情的沙漠》,哈哈!
王:係呀!當時一半嘅女仔係同吳卓羲跳舞,另一半就要同我跳,咁啱你就係拍住我一齊跳。

 苟:我記得好清楚,我當日病咗冇乜力氣,但君馨畀咗好多耐性我,搞到佢跳舞嘅動作要跳得heavy啲,我就跳得輕鬆啲,好彩最後個效果出到嚟都唔錯!

 http://orientaldaily.on.cc/cnt/entertainment/20130414/photo/0414-00282-070b4.jpg
 2009年參選華姐的苟芸慧,泳裝示人。

 http://orientaldaily.on.cc/cnt/entertainment/20130414/photo/0414-00282-070b5.jpg
 一眾靚女去年為無綫台慶表演歌舞。

 http://orientaldaily.on.cc/cnt/entertainment/20130414/photo/0414-00282-070b6.jpg
 君馨(左)與苟姑娘鬥擺古怪表情。

 王:嗰年跳舞好難,因為着住對鞋嘅鞋底有鐵,擦個地板係有火花,所以都幾大挑選!我記得最初見到你哋參選嗰廿八個女仔,已經覺得你好靚,應該入梗三甲!
苟:我覺得你都好靚,對眼好似識講嘢咁,加埋你個body language,呢樣嘢係好少女仔可以有!
語文理解最大挑戰
苟:我哋喺外國返嚟,唔單止係學中文咁簡單,仲要學習中國文化,好多人講一句說話,可能蘊含好多意思。所以我有一段時間都變得好掙扎,而且會諗多咗嘢,例如會諗嗰句說話有正面意思定係反面意思呢,呢樣嘢對於一個鬼妹仔嚟講係一個好大嘅挑戰!
王:同埋唔好驚了解錯個意思,因為不知者不罪,所以唔好畀自己一個好大壓力。
苟:我記得我啱啱入行,啲人就話:「得閒飲茶!」但之後冇一次真係飲茶。呢樣嘢我以前會唔明,因為以前講出嚟嘅嘢,真係會做!後來先慢慢明白係「See you later」嘅意思!之後我哋拍劇集《荃家福祿壽》,當佢哋講「殺你」嘅時候,我都唔明白,仲心諗:「做乜要殺我?」
王:嗯‥‥‥我都明白,有時我哋咬字唔清楚,都會唔小心講咗粗口,呢啲係最唔好意思,尤其喺前輩面前,哈哈!
苟:呢個都係我之前嘅壓力,因為公眾人物影響範圍好大,例如會影響到啲小朋友,但愈係着緊一樣嘢,就會愈講多錯多。
王:我記得第一次嚟香港,要去鰂魚涌跳舞,我將「鰂魚涌」講咗做「拮魚春」,搞到畀我問路嘅先生都唔知我想去邊。去酒樓仲搞笑,我嗌「燒賣」,我又講咗「燒米」,而「蛋撻」我又講咗「蛋卡」,「夏枯草」講咗做「合枯草」。
苟:我完全明白,因為會將英文同中文撈亂,好似我將「芒果」講成「Man果」一樣。
王:同埋我喺美國講咗咁多年,都冇人correct我!以前講「蛋卡」同「合枯草」,個個都明白我講乜‥‥‥
苟:不過比較起嚟,你真係勇敢好多,至少你會願意去講。好多時我搭的士,寧願叫人send個message嚟,然後指個地點畀司機睇!但其實應該好似君馨咁,不停挑戰自己,畀多啲信心自己講中文。
後記:
王君馨與苟姑娘曾被捧為女神,同時亦被網民踩得體無完膚,評價時好時壞。不過兩人之間有個妥協,就是不易被別人動搖自我價值,君馨說:「有次同苟苟出席電 影首映,呢啲場合通常會見到好多電影監製、演員,好多時會希望人哋欣賞你,但我同苟苟都希望做到唔會因為得到別人欣賞而令自我價值提高,得唔到別人嘅認同 就令價值變低!」苟姑娘續說:「嗰日我哋仲主動去觀察周邊啲人,結果過了一個開心嘅晚上!」

No comments:

Post a Comment

Follow by Email

随机乱放