August 17, 2010

阿Sa十年怕草繩 林峯寧願搵阿四

林峯與蔡卓妍(阿Sa)兩位當時得令的偶像派,對愛情似乎已失去信心,阿峯直言工作繁忙根本無暇經營愛情,寧可找一個「阿四」多於女友,而失婚的阿Sa對再次組織家庭則有點猶豫不決,令人不勝唏噓!

近日阿Sa與阿峯於英皇與邵氏合作的電影《翡翠明珠》大玩四角戀,不過於現實生活中,兩人異口同聲表示絕不接受,阿Sa坦言身邊朋友曾有這種經歷,最後竟 以「男人識得返屋企」便接受,令她大感無奈,她謂:「有呢啲情況,就算我幾愛都會狠心即刻走,可能我係天蠍座,愛嘅人我會畀晒自己嘅愛佢,但同時我佔有欲 都好強,我要做對方嘅唯一,相反對方都係我嘅唯一。」

做聆聽者就夠

自大學後已沒再闖情關的阿峯,表示根本不會開始一段混亂的愛情,自言一直希望擁有愛情,但當想到密麻麻的工作表時便自然卻步,絕對不敢驚動它,更笑謂:「之前同吳卓羲傾將來女友問題,講笑話呢行人係需要一個『阿四』多過女友囉!」

至於與鄭中基的4年婚姻觸礁,令阿Sa對愛情 觀有了新想法,表示現時活得舒服,不強求及釋懷,不過當問到會否再組織家庭時,阿Sa卻一臉猶豫說:「我都唔知,經歷過一次婚姻,兩個人學識到信任大家, 去守一個承諾,但原來係會有好多問題,所以我唔會再刻意強求囉。(係咪好享受依家單身生活?)享受所有嘢,依家唔會驚有啲咩會影響到我,我會搵人傾訴,但 唔需要安慰,做我聆聽者就夠,我知自己會慢慢好,因為我從來冇逼自己入死角,尋死嗰種。」

體魄似個阿婆
阿峯與阿Sa於娛樂圈逾十年,雖然名成利就, 但背後犧牲亦不少,阿峯謂:「其實都幾矛盾,以前好想賺多啲錢,等家人生活無憂,但到頭來發現有好多時段我係miss咗!」而近幾年身體每況愈下的阿 Sa,則坦言倘若他朝決定要淡出或轉行,全因健康問題,她謂:「我依家啲病係好難好,以前自己一個人嘅活動我從來唔缺席,但之前一次去上海嘅孭飛活動,架 車去到機場真係頂唔順要返轉頭,唱歌、拍戲係我理想,但身體唔好就咩都做唔到,依家體魄成個阿婆咁,所以有念頭想休息。」

雖然有說人生沒有多少個十年,但對於在娛樂圈打滾了多年的阿峯及阿Sa來說,金錢並非現階段想追求的,阿峯謂:「嚟緊日子我嘅工作節奏會調配好啲,想多啲 時間陪屋企人,Daddy、媽咪年紀開始大,我好希望出年帶佢哋環遊世界。」原來阿峯自入行以來,舉家旅行最遠的目的地只是汕頭,而父母欲與他見面,亦只 能大老遠乘飛機到他登台的地方,相處時間也只限於食餐飯。

說到此,阿峯亦不禁自責, 他謂:「父母唔需要我畀錢,唔係要金錢上滿足,所以我想帶媽咪出街買衫,因為細個過年係媽咪買衫畀我哋,雖然好小嘅嘢,但相信佢會開心囉!(咁少時間見, 唔叫父母一齊住?)因為父母有生意喺內地,唔可以嚟香港長住,但我哋都叫做有定期開家庭會議,講吓大家大計咁,都唔係冇溝通o架。」

放棄追逐名利
阿Sa則有意放棄追逐名利,以一年休息時間來調理身體,雖說一年間變化可能很大,但阿Sa坦言「唔顧得咁多」:「咁命運注定咗做呢個職業,我係奉獻畀藝 術,就算休息完都會繼續,記得舊年最嚴重試過突然暈低,好得人驚,我本身有血糖低同腸胃抽筋,以前暈之前都知,但今次完全預計唔到,醫生話冇藥可以預防 添!」

狂使錢一鋪清
林峯出生於富裕家庭,阿Sa則在小康之家成長,對於錢銀觀念,兩人卻又出奇地合拍,阿Sa自爆被同行取笑為孤寒一族,她謂:「除咗買車買樓條數大之外,我覺得用10萬蚊去買一樣嘢,對我嚟講已經好貴,Mani成日叫我買鑽石保值,話幾年後就升,但我認為唔係必需品囉!」

不過甚疼錫家人的她,坦言若大灑金錢於 他們身上,絕對心甘命抵,如早前阿Sa的公公病重,正忙於工作無法抽身的她,為了爭取時間,惟有大破慳囊以直升機,穿梭澳門醫院探望至敬愛的公公,她說: 「唔夠一星期已經5萬幾蚊,但屋企人就冇計啦!因為我同屋企人關係好close,就算唔見都成日講電話,老竇呢排仲玩埋微博,所以大家都會透過呢個渠道溝 通。」

向來住在父母位於半山豪宅的阿峯,早前終把入行十年來的積蓄花光,一擲近二千萬買下西環千多呎豪宅自住,再以百多萬買了一架馬莎拉蒂跑車作為獎勵自己,他謂:「哈哈!平時冇咩機會使錢,今次一次清袋,咪重新再嚟儲過囉!」


「我要做對方嘅唯一,相反對方都係我嘅唯一。」經歷過一次婚姻的蔡卓妍,對會否再組家庭有所保留。


「呢行人係需要一個『阿四』多過女友囉!」





林峯與蔡卓妍兩個大細路,一碰面即玩個不停。




林峯與蔡卓妍正為事業打拚,暫未有時間經營愛情。




阿Sa和林峯在《翡翠明珠》中有不少親熱戲份。(資料圖片)

No comments:

Post a Comment

Follow by Email

随机乱放