June 1, 2010

廖碧兒自創功夫舞加國奪獎

廖碧兒最近再以打女姿態參與電影,從小學習跆拳道的她,原來乃受李小龍電影影響,更把功夫融入舞蹈作賽,結果為她在加國奪得獎項。

碧兒與杜宇航最近合作電影《葉問前傳》,片中連場打鬥,讓兩位熱愛功夫的年輕人過足戲癮,雖然曾學習跆拳道6年,但跟詠春大有不同,故碧兒趁開拍前上堂惡補,沒料一試上癮,拍罷該片後更專程拜師學詠春,她謂:「其實功夫呢樣嘢,係我細個喺加拿大睇李小龍電影認識,後來我仲用咗佢電影入面一首歌做音樂,自己編咗隻舞,入面加入功夫元素去比賽,嗰時得12歲,結果得到個特別獎。」

望影視平衡發展

接二連三接拍功夫片,問到是否想進軍打女行列,碧兒笑指尚未有打算,更謂:「呢兩年電影市場的確多咗打戲,咪睇吓自己有冇機會囉!其實我希望影、視可以平衡發展,好似下個月我都會拍劇啦!」

於片中演葉問的杜宇航,被問到有否欣賞甄子丹主演的《葉問》系列來取經,他謂:「子丹喺《葉》片真係好出色,但今次我演嘅葉問角色年齡介乎12到28歲階段,我覺得本身性格都幾似葉問,都係一個好文靜嘅人,細細個學功夫,只係時代唔同啫。」

拍洪金寶超緊張

談到以新人姿態登場,杜宇航不諱言深感壓力,除了擔當主角外,還要與大班前輩合作,他說:「我記得拍《葉問2》同洪金寶做對手戲好緊張,佢、子丹同樊少皇個個都起碼有10年以上演戲經驗,我雖然只係講幾句對白,但都好似參加大賽嘅感覺咁。」

廖碧兒
廖碧兒從小受李小龍電影影響,因而對功夫產生興趣。

廖碧兒
廖碧兒在新片中打戲連場,過足戲癮。

廖碧兒
杜宇航擁有多年武術經驗,故不時指導碧兒。

No comments:

Post a Comment

Follow by Email